ಮೂಡುಬಿದಿರೆ: ಸ್ವಚ್ಛ ಭಾರತ ಮಿಷನ್ (ನಗರ) – 2.0 ಯೋಜನೆಯ ಅನ್ವಯ ಕೇಂದ್ರ ವಸತಿ ಹಾಗೂ ನಗರ ವ್ಯವಹಾರಗಳ ಸಚಿವಾಲಯದ ವತಿಯಿಂದ ಪ್ರತೀ ವರ್ಷವೂ ದೇಶಾದ್ಯಂತ ಎಲ್ಲಾ ನಗರಗಳಲ್ಲಿ ನಡೆಸುವ ಸ್ವಚ್ಛತೆಯ ಸಮೀಕ್ಷೆ “ಸ್ವಚ್ಛ ಸರ್ವೇಕ್ಷಣೆ 2025-26 ರಲ್ಲಿ” ನಾಗರಿಕರ ಅಭಿಪ್ರಾಯ ನೀಡುವ ಅವಕಾಶ ಈಗ ಮೂಡುಬಿದಿರೆಯ ಎಲ್ಲಾ ನಾಗರಿಕರಿಗೆ ಲಭ್ಯವಿದೆ.
ಇದರ ಸದುಪಯೋಗವನ್ನು ಪಡೆದುಕೊಂಡು ಮೂಡುಬಿದಿರೆಯ ಎಲ್ಲಾ ಜನಸಾಮಾನ್ಯರು ತಕ್ಷಣವೇ ತಮ್ಮ ಸ್ಮಾರ್ಟ್ ಮೊಬೈಲ್ ನಿಂದ ಕೆಳಗಿನ QR ಕೋಡ್ ಸ್ಕ್ಯಾನ್ ಮಾಡುವ ಮುಖಾಂತರ ಅಥವಾ https://cf.sbmurban.org/ ವೆಬ್ ಲಿಂಕ್ ಬಳಸುವ ಮುಖಾಂತರ ಬಹುಆಯ್ಕೆಯ ಹಲವು ಸರಳ ಪ್ರಶ್ನೆಗಳನ್ನು ಕೇವಲ 2 ನಿಮಿಷಗಳ ಸಮಯದಲ್ಲಿ ಉತ್ತರಿಸಿ ಮೂಡುಬಿದಿರೆ ನಗರದ ಸ್ವಚ್ಛತೆ ಹಾಗೂ ನೈರ್ಮಲ್ಯದ ಕುರಿತಾದ ತಮ್ಮ ನೈಜ ಅಭಿಪ್ರಾಯವನ್ನು ದಾಖಲಿಸಿ, ಮೂಡುಬಿದಿರೆ ನಗರವನ್ನು ಸ್ವಚ್ಛತೆಯ ಮಾನದಂಡದಲ್ಲಿ ಮುಂಚೂಣಿಯಾಗಿಸಲು ಸಹಕರಿಸುವ ಅವಕಾಶವಿದೆ.
ಆದುದರಿಂದ ಈ ಅವಕಾಶವನ್ನು ಮೂಡುಬಿದಿರೆ ಪುರಸಭೆಯ ಎಲ್ಲಾ ನಾಗರಿಕರು ಕಡ್ಡಾಯವಾಗಿ ಬಳಸಿಕೊಂಡು ಪುರಸಭೆಗೆ ಸಹಕರಿಸುವಂತೆ ಹಾಗೂ ಇದರೊಂದಿಗೆ ಕಸವನ್ನು ಹಸಿ ಕಸ, ಒಣ ಕಸ, ಅಪಾಯಕಾರಿ ಕಸ, ಹಾನಿಕಾರಕ ಕಸವಾಗಿ ವಿಂಗಡಿಸುವುದು; ಸಾರ್ವಜನಿಕ ಸ್ಥಳಗಳಾದ ಮಾರುಕಟ್ಟೆ, ಬಸ್ ನಿಲ್ದಾಣ, ಉದ್ಯಾನವನ, ಸಾರ್ವಜನಿಕ ಶೌಚಾಲಯ, ಧಾರ್ಮಿಕ ಕ್ಷೇತ್ರಗಳು, ಮನೆಯ ಪ್ರದೇಶಗಳು, ಇತರೆಡೆಗಳಲ್ಲಿ ಸ್ವಚ್ಛತೆ ಕಾಪಾಡಿಕೊಳ್ಳುವ ಅಭ್ಯಾಸ ರೂಢಿಸಿಕೊಂಡು; ಮನೆಯಿಂದಲೇ ಬಟ್ಟೆಯ ಚೀಲಗಳನ್ನು ತರುವ ಅಭ್ಯಾಸದೊಂದಿಗೆ ಭಾಗಿಯಾಗಲು ಮೂಡುಬಿದಿರೆ ಪುರಸಭೆಯ ಮುಖ್ಯಾಧಿಕಾರಿಯವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
